ڕۆژا پێنجشەمبی ڕێــککــەڤتی (٢٠٢٥/٦/٥) ب ئامادەبوونا خانم (ئامینا زکری) ئەنداما مەکتەبا سیاسیا پارتی دیموکراتی کوردستان و ڕێزدار (پ.د. دیار عبدالکریم سعید) سەرۆکێ زانکۆیا زاخۆ، نوینەرێ پارێزگارێ دهۆکێ و سەرۆک و نوینەرێن زانکۆیێن زاخۆ و دهۆک، پۆلیتەکنیکی دهۆک، نەورۆز و ئاکرێ، ئەکادیمیا کوردی، ئێکەتیا نڤیسەرێن کورد، ڕێڤەبەرێن گشتییێن پەروەردێ ل دهۆک و زاخۆ، زانکۆیێن زاخۆ و دهۆک کۆمبوونەکا گرنگ و ل ئاستەکێ بلند بۆ دانوستاندن و بریاردان ل دۆر ڕێبەرێ ڕاستنڤیسا زمانێ کوردی - زاراڤێ کرمانجی ب ئەلفابێیا عەرەبی، ل سەنتەرێ ڕەوشەنبیری و جڤاکییێ زانکۆیا دهۆک ئەنجامدان.
دهێتە زانین؛ ئەڤ کومبوونە د چارچۆڤێ پڕۆژەیەکێ هەڤپشکێ هەردۆک زانکۆیێن زاخۆ و دهۆکێ بوویە، مەرەم ژێ ستاندارکرنا ڕاستنڤیسا کرمانجیە ب ئەلفابێیا عەرەبی، هیڤیێن مەزن هەنە بشێن گوهۆڕینێن سەرتاسەری د پەروەردەیا زمانێ کوردی دا ل دەڤەرا بەهدینان بهێنە کرن.
د ئەڤێ کۆمبوونێ دا، د کەشوهەوایەکێ ئارام و جوان و پڕی لێکتێگەهشتن دا، دانوستاندنێن کویر ل دۆر پرۆژەی هاتنە ئەنجامدان و هەمی نوینەرێن لایەنێن پەیوەندیدار پێشوازیەکا گەرم ل پرۆژەی کر و هەر ئێکی ژ لایێ خۆ ڤە بەرهەڤیا خۆ دیارکر بۆ پشتەڤانیا ڤی پرۆژەیی، کۆ پشتی بریار ل سەر ڕێبەرێ ڕاستنڤیسا کرمانجی دهێتە دان، دێ بیتە پیڤەر بۆ نڤیسینێ و دێ هێتە بجهئینان. هەروەسا د پێنگاڤێن داهاتی یێن پرۆژێ رێبەرێ ڕاستنڤیسا کرمانجی دا، ب میکانیزمەکا دەستنیشانکری، دێ بریار ل سەر هێتە دان، داکو ل سەر ئاستێن ئەکادیمی و فەرمی ببیتە رێبەرێ نڤیسینێ.
هەژی ئاماژێ یە ئەڤ رێزدارێن ل خوارێ ب نوینەراتیا سازیێن خۆ د کۆمبوونێ دا ئامادەببوون:
- خانم ئامینا زکری (ئەنداما مەکتەبا سیاسیا پارتی دیموکراتی کوردستان).
- ماجد سەید سالح (جێگرێ پارێزگارێ دهۆکێ).
- د. ڤیان سلێمان (بسپۆرا زمانێ کوردی و جێگرا بەرپرسێ مەکتەبا رێکخستنا پارتی ل دهۆکێ).
- د. دیار عبدالکریم سعید (سەرۆکێ زانکۆیا زاخۆ).
- د. ئاری عادل (سەرۆکا زانکۆیا پۆلیتەکنیکیا دهۆکێ).
- د. مەنهەل ئیلهام عەبدال (سەرۆکێ زانکۆیا ئاکرێ بۆ زانستێن پراکتیکی).
- د. هۆگر تاهر تەوفیق (هاریکارێ سەرۆکێ زانکۆیا نەورۆز).
- موئەیەد تەیب (نوینەرێ ئەکادیمیا کوردی).
- ئێحسان ئامێدی (بەرپرسێ دەزگەهێ خانی یێ رەوشەنبیری و راگەهاندنێ).
- حەسەن سلێڤانی (سەرۆکێ ئێکەتیا نڤیسەرێن کورد-تایێ دهۆکێ).
- عومەر عەلی تاها (رێڤەبەرێ گشتیێ پەروەردا دهۆکێ).
- سەلام حەسو بیرو (رێڤەبەرێ گشتیێ پەروەردا زاخۆ).